Laikroksta "Diena" korespondente gostūs Dagdys nūvodā
Anna Rancāne, laikroksta "Diena" korespondente Latgolā, 24.febralī gasteja Dagdys nūvodā. Tyvuokajā laikā laikrokstā tiks publicāti treis roksti, kuru golvonī ļauds byus Olga Lukjanska (Osyunys Tautys noma vadeituoja), jaunīšu bīdreiba "Dagne" i uzjiemiejs Valērijs Bluss.
Pyrmais nu kreisuos V.Bluss
Gostūs pi "Dagnes"
Apsaverūt K.Raudives ustobu
Sadarbeibā ar Dagdys nūvoda pašvaļdeibys Sabīdriskūs attīceibu i komunikacejis nūdali A.Rancāne sastuodeja dorba dīnys kuorteibu i gribie īsapazeit ar kaidu aktivu cylvāku Dagdys nūvodā, kas ir sova pogosta lapnums - saruna ar Olgu Lukjansku jaunizremontātajuos Osyunys Tautys noma ustobuos paguo sirsneigā gaisūtnē. A.Rancāne atzeimeja, ka bejs pateikamai puorrunuot ar Olgu latgaliski. Kai izaruodeja - taišni tymā pošā dīnā iz Osyuni beja atbraukuši ari Lauku atbolsta dīnesta puorstuovi, kas veice Osyunys TN rekonstrukcejis projekta nūslāguma puorbaudi, bet nu ekspertu puses tyka atzeimāts, ka itaidus veiksmeigi nūslāgtus projektus izviertēt ir pateikams pīnuokums. Pi reizis A.Rncāne izmontova īspieju apsavērt Konstantina Raudives pīminis ustobu Osyunes pamatškolā.
Tymā pošā dīnā A.Rancāne tykuos ari ar jaunīšu bīdreibys "Dagne" puorstuovim - eipaši interesieja nasenejuo labdareibys akceja, kurys ītvorā sataiseita bārnu raksteitūs puorsoku gruomota, ar kuras paleidzeibu teik guoduots paleidzēt treisgadeigajam Dmitrijam veseleibys uzlobuošonai. Zīduojumu vuokšona turpynojās.
Visa golā, pa ceļam iz Rēzekni, gostūs sagaideja uzjiemiejs Valerijs Bluss. A.Rancāne beja pateikamai puorsteigta par uzjiemieja darbeibys vierīni atpyutys kompleksā "Obiteļs" (Obi-celi?) i zīmys perioda seviškū pīduovuojumu - slyduošonys īspiejom.
Anna Rancāne sūleja ari iz prīšku naaizmierst par Dagdys nūvoda ļaudim i vys jau vēļ kaidu rokstu sagataveit deļ Latvejis mārūga avīzes "Diena".
Informaceji sagataveja: Dagdys nūvoda pašvaļdeibys Sabīdriskūs attīceibu i komunikacejis nūdalis vadeituojs Jurs Viļums, info@dagda.lv