Dagdys nūvods sveic "Latgolys Māru" 70 godu jubilejā
8.septembrī Rēzeknī tyka aicynuoti Latgolys pašvaļdeibu vadeituoji i puorstuovi, lai kūpeigi atzeimātu pīminekļa "Vienoti Latvijai" pymruos atkluošonys 70 godu jubileji. Pasuokumā pīsadaleja ari Dagdys nūvoda prīšksādātuojs Viktors Stikuts.
Pyrma 70 godim 8.septembrī Latgola īgive sovys viesturis, ticeibys, spāka i jaunu cereibu simbolu - piec Ludzys puses studenta skices veiduotu, muokslys ekspertu augsti nūviertietu pīminekli, veļteitu 1919.goda Latgolys atbreivuotuojim. Piec tam divreiz nūrauts, bet okton atjaunuots vysod ar uzroksu "Vienoti Latvijai", tautā nūsaukts kai "Latgolys Muora"...
1939.goda 8.septembrī pyrmuo Muorys pīminekļa atkluošona tyka saskaņuota ar kristeiguo pasauļa Muorys zemis kieninīnes, Dīva muotes dzimšonys dīnu. Ari 2009.goda tyma pošā datumā Rēzeknī bazneica tyka pylna nu ļaužu, koč ari daudzejim dorba/vuiceibu dīna. Paļdis veiskupam Juoņam Buļam, kas itymā dīnā sovu runu ceņtēs turēt konsekventi latgalisku ar aicynuojumu byut vīnuotim īvārojūt kristeigūs dzeivis princypus, ryupejūtīs par sovys saimis, nūvoda i vysys vaļsts lobkluojeibu, kai ari latgalīšu volūdys sorguošonu! Dīvkolpuojuma beiguos, kai vīnuoteibys zeime tyka kūpeigi nūdzīduota dzīsme visim rūkuos sasadūdūt, kai ari nūslāgumā Latvejis vaļsts himna: "Dievs, svētī Latviju!"
A pi Muorys pīminekļa asūt likti zīdi jau nu poša reita i veiduotys kompozicejis Muorys krystu konturu veidā, deļ tam iz pušdiņlaiku, kod pīmenekli apmekleja dažaidu pašvaļdeibu delegaceja ar svineigu puču nūlikšonu, 70 godu dzimšonys jubilejis svynātuoja jau beja sapuškuota kruosainu rudiņs zīdu musturūs. Ari Dagdys nūvoda dūmes prīšksādātuojs Viktors Stikuts, puorstuovi nu Dagdys pašvaļdeibys i jaunīši nūlyka zīdus pi Latgolys simbola.
Okton juosoka paļdis juo ekselencei Juoņam Buļam, kas runu saceja latgaliski, kai ari atguodynova Muorys simbola nūzeimi latgalīšu i vysu kristīšu dzeivē - na veļti 1993.goda vizitē pāvests Juoņs Puovuls II izkuopūt nu lidmašynys iz reiz nūbučova myusu zemi!
Vokorā Rēzeknis Kuļturys nomā nūtyka sazatikšona ar vairuokim 1992.godā nūtykušuo pīminekļa "Vienoti Latvijai" atjaunuošonys vaininīkim: Osvalsts Zvejsalnīks, Pīters Keišs, tieļnīku radinīki... Interesantys sarunys i kūpeigu kuriozu atstuosti latvīšu oficialajā volūdā, sovulaik zīduojumu vuokšonys iniciativai izveiduotuo "Muorys kuora" prīšknesumi. Leidz Annys Rancānis latgaliskuos dzejis prīšklasejumam i retoriskajam vaicuojumam: "A kū myusu paaudze atstuos piec sevis?" Cik mes asom vīnuoti sovūs dorbūs šudiņ?
I tod beja dīnys "soldonais iedīņs" - Voldemāra Ivdra i Māra Justa veiduotuos dokumentaluos filmys "Latgales Māras ceļš" pyrmizruode. Filma hronologiski pastuosta pīminekļa izveides īceres atteisteibu, nūuordiešonys i atjaunuošonu gaitu... Ceru, ka tū byus īspieja nūzavērt kai interneta lītuotuojim tai školu audzieknim! Dagdys TV jau uzsuoce sarunys, kab dabuotu atļuovi paruodeit itū filmu Dagdys nūvoda dzeivuotuojim.
Pīmineklis "Vienoti Latvijai" sovulaik calts i atjaunuots ar vysys tautys atbolstu i par sazīduotajim leidzeklim kai simbols Latgolys vīnuoteibai ar Latveji i Latvejis vīnuoteibai ar Latgolu; myusu vysu vajadzeibai byut vīnuotim, kab atteisteitu vaļsti tymā virzīnī, par kuru tyka dūmuots jau pi Latvejis izveiduošonys.
Ari Dagdys nūvodā - byusim vīnuoti Latvejai!